MSI 喺電競界嘅地位當然唔可以忽視啦,有打開機嘅朋友都一定會聽過佢地嘅底板同顯示卡。

而 MSI 嘅遊戲週邊都係非常出名架,當中包括電競滑鼠、電競鍵盤、手制等等,打開機嘅冇理由未聽過啦。

咁今次我地就黎睇下呢排推出咗冇耐嘅 MSI VIGOR GK50 ELITE 究竟係一個點樣嘅電競鍵盤。

 

開箱

整體包裝簡潔,比你一睇就知 GK50 ELITE 係一個有 RGB 燈嘅機械式鍵盤。

 

配件方面, GK50 ELITE 隨盒附送一隻鍵帽夾,仲有替換用嘅 ALT 同 CTRL 鍵帽,方便用家有需要嘅時候更換同埋清潔鍵帽。

 

外觀 + RGB 效果

GK50 ELITE 係一隻標準 100% 104鍵嘅鍵盤,有齊哂常見鍵盤入面嘅按鍵,包括數字鍵。

 

GK50 ELITE 嘅左右兩邊仲有墊高腳墊,用家可以按自己喜好調節鍵盤斜度。個腳墊仲要好厚好實淨,用得耐都唔怕整斷腳墊。

 

仲有值得一提嘅係 GK50 ELITE 條 USB 線。佢同普通鍵盤嘅用料唔一樣,線嘅外層唔係用膠造,而係用編織線整出黎。

呢一種線唔單只望落靚啲,摸上手舒服啲,而且仲可以好好咁保護到條 USB 線嘅入面,令到 GK50 ELITE 更加耐用。

 

同時 GK50 ELITE 嘅「裸軸」(即軸體外露) 設計,令佢嘅 RGB 嘅燈光效果更加突出!

 

手感

頭先都有提過下「軸體」呢一樣嘢啦。咁講起機械式鍵盤就一定要講下鍵盤入面嘅「軸」 (switch)

未聽過咩係機械鍵盤軸?唔洗擔心,呢度都會好簡單咁介紹下唔同嘅機械鍵盤軸體。

 

機械鍵盤軸有唔同嘅款式,會用顏色去分辨,各有唔同特色,目前主流嘅有以下呢四種 :

青軸 : 機械軸中最有代表性,打落去會發出「咔咔」聲,有強烈段落感,文書打機都適合。

紅軸 : 冇段落感,手感直上直落,感應速度快,適合遊戲玩家。

茶軸 : 打落去有段落感,但唔似青軸咁明顯,亦唔會發出「咔咔」聲。

黑軸 : 同紅軸一樣冇段落感,手感直上直落,但回饋力道強,適合打字大力嘅用家。

 

而 MSI VIGOR GK50 ELITE 就係用咗凱華所推出嘅青軸,亦即係上面所提到嘅青軸。

GK50 ELITE 打落去非常清脆,當你隻手指到達咗觸發點嘅時候會感受到好明顯嘅回饋,而且仲要發出一下「咔」嘅聲音,令到噤落去呢個鍵盤嘅每一下都非常之有滿足感。

處理文書工作嘅時候「咔」一聲嘅回饋令你知道已經噤咗個制,之後立即可以噤下一個制,令打字效率提升。而打機嘅時候仲可以好明顯咁比玩家知道自己係咪已經噤咗個制,提升玩家反應,令你唔會錯過任何一次嘅進攻機會。

青軸嘅特色令到呢隻 GK50 ELITE 照顧到唔同用家嘅需要。不論你係要處理文書工作同打論文,定係要用黎打機,又或者兩者都需要嘅話,GK50 ELITE 都非常之適合你用!

 

軟件

GK50 ELITE 有一點好方便嘅就係唔需要專用軟件都可以更改個鍵盤嘅設定。如果你唔鐘意喺部電腦度安裝軟件咁煩嘅話,你都可以用到呢個鍵盤嘅唔同功能架。

 

例如噤 FN鍵 + INS鍵 就已經可以切換唔同嘅燈光效果。

 

仲有非常好用嘅媒體鍵,方便你聽歌睇片時控制播放停止,又或者睇片打機嘅時候較大細聲。

 

最後仲有個好細心嘅功能,當你覺得設定到個鍵盤好亂好迷失嘅時候,只要噤實 FN 鍵 +  ESC 鍵 3 秒就可以重設成個鍵盤。無論你點用都唔洗怕還原唔到預設設定。

 

當然,對於啲 hard-core 嘅玩家黎講,咁樣係絕對唔足夠嘅。呢個時候就可以安裝 MSI 官方嘅 Dragon Center 軟件。

 

喺 Dragon Center 入面用家可以直接選擇各種燈光效果,調色盤功能仲可以比你完全自訂你鐘意嘅顏色。

 

除此之外, Dragon Center 入面仲可以比用家設定同錄製巨集,令你打機嘅時候多個小幫手。

 

下面仲有條片,可以比大家睇下 GK50 ELITE 嘅 RGB 效果,同聽下凱華青軸嘅按鍵聲。

 

總結

擁有青軸按鍵嘅 MSI GK50 ELITE 打落清脆爽手,有強烈回饋感覺,適合有文書處理需要又要打機嘅人。

如果你係大學生自己一個人一間房,又或者你個 roommate 唔介意嘈嘅話,呢隻 GK50 ELITE 實在非常適合。

當然啦,對於要集中用黎打機嘅朋友黎講,青軸嘅明顯回饋令到反應提升, GK50 ELITE 都係一個唔錯嘅選擇。再加上 GK50 ELITE 自帶嘅巨集功能都好適合有一定要求嘅玩家使用。

最後,青軸鍵盤嘅通用性令到 GK50 ELITE 成為一個優秀嘅機械式鍵盤入門選擇。如果你係從未用過機械式鍵盤而又想試下嘅話,呢一隻 MSI VIGOR GK50 ELITE 絕對值得一試。

 

保養: 1 年保養

型號: KB-MGK5ELT

 

建議零售價: HKD$699

 

購買連結: https://shop.hornington.com/products/msi-gaming-gear-vigor-gk50-elite-kailh-blue

 

MSI 官方網站 : https://tw.msi.com/Gaming-gear/VIGOR-GK50-ELITE-KAILH-BLUE