【開箱】超抵玩電競鍵盤

【開箱】超抵玩電競鍵盤 – MSI VIGOR GK20

2020-11-10

講起打機最重要除咗個 mouse 仲有就係個 keyboard 啦。對於唔少朋友黎講要投資成 $500 ~ $700 落去個 keyboard 度可能會覺得太肉赤，其實我都係。

咁如果想試下玩打機用嘅 keyboard 又應該點樣入手呢？咁小編我呢，就揀咗呢一個由 MSI 推出嘅超抵玩電競 keyboard – VIGOR GK20 。

從個包裝外面已經睇到 VIGOR GK20 齊備各種電競鍵盤嘅基本功能。

GK20 嘅外觀設計非常之簡潔整齊，而且仲有彩色嘅靜態燈光效果，十分靚仔。

對於用黎打機嘅鍵盤，最重要就係夠穩陣。而 GK20 就擁有 Gaming Base 嘅底座設計，唔只得左下同右下有防滑腳墊，連空白鍵對下嘅位置都有一張腳墊。

而且啲腳墊仲係軟身嘅，可以好實咁啜住張枱，非常之穩陣，咁就唔洗怕打打下機移咗位，攪到分分鐘撳錯制！

雖然空白鍵下面多張腳墊只係一個少少嘅變化，但係呢一種細心嘅改動就已經令到整個空白鍵撳落去嘅時候感覺實淨好多。同絕大部份其他 keyboard 比，個空白鍵唔會有一種好空洞同埋好似撳極都未撳到底嘅感覺。呢一啲細節位都有留意到， MSI 的確抵讚！

除咗啲腳墊之外，keyboard 個支撐架都一樣整得好細心。支撐架背面本身都係一個硬身嘅腳墊，而打開咗個支撐架之後隻腳下面都有腳墊吸實張枱，令到個 keyboard 整體依然好穩陣。

而且個支撐架仲要係比其他常見嘅 keyboard 厚身，打機緊張大力都唔怕會打到個架斷。同時支撐架個升高角度都好舒適，整體感覺非常可靠。

唔止個設計細心，呢個 GK20 仲自帶有唔少方便嘅功能。用家唔需要安裝軟件都可以直接透過龍魂 FN 鍵組合改變 RGB 模式同埋亮度。

除此之外，用家仲可以利用龍魂 FN 鍵 + F9 ~ PAUSE 嘅呢 7 粒制，控制多媒體功能，做緊其他嘢時又想聽歌就好方便，唔洗用 mouse 撳黎撳去。

最後 GK20 仲有最重要嘅防鬼鍵功能。GK20 嘅特殊設計令到「QWERASDFZXCV」以上 12 個按鍵係特別地防鬼鍵嘅。

以一般薄膜式鍵盤黎講防鬼鍵算係少有，絕大部份薄膜式鍵盤喺同一時間撳多幾個制就會冇哂反應。而 MSI 喺呢個 GK20 整咗防鬼鍵功能，就可以舒緩到打機嘅時候，要同時撳多個制但最後冇反應，攪無啦啦角色硬直咗嘅問題。

而 MSI 特別選擇咗「QWERASDFZXCV」呢 12 個制，明顯係為打機而設。

小編就喺打 FPS 類型嘅遊戲時候最有感覺，因為 FPS 一定要用到「WASD」去移動，同時又需要利用周圍嘅制 (例如 C 同 R)，去做近戰或者上彈等等嘅其他動作。呢個時候 GK20 嘅防鬼鍵設計就非常有用，戰鬥期間做多個動作都唔洗就黎就去，一撳立即就有反應。

打黎緊推出嘅 Call of Duty: Black Ops Cold War 嘅時候要上彈都唔怕撳極都冇反應啦~

總結

整體而言呢個 MSI 嘅 VIGOR GK20 係一個非常抵玩嘅入門電競鍵盤。佢有齊哂電競鍵盤應有嘅功能，同時又有唔少方便同貼心嘅設計，例如最重要嘅防鬼鍵功能、媒體鍵、同埋空白鍵下面嘅防滑腳墊等等。

可以見到盡管 GK20 係一個入門級嘅產品，但係 MSI 都花咗唔少心思落去，照顧玩家嘅需要。加上呢個 GK20 原價都只係 $299，簡直係物超所值！未有 gaming keyboard 嘅朋友值得買黎玩下！

MSI VIGOR GK20 電競鍵盤

保養: 1 年保養

型號: KB-MGK2T

建議零售價: HKD$299