MSI 近排就推出咗一隻非常特別嘅電競 mon，佢個名就好長嘅，叫 Optix MAG274QRF-QD。
佢最大嘅特色就係用咗量子點技術，仲有 165Hz 嘅 Rapid IPS 面板，以電競 mon 而言真係非常罕見。
咁究竟佢出到嚟個畫面表現又係點嘅呢？答案即將開估！
開箱
MAG274QRF-QD 唔單止個名長，隻 mon 個尺寸都好大，有成 27 吋。
咁有成 27 吋嘅 mon，個箱唔使問一定大，小編我拎返去嘅時候都幾吃力下，建議各位要買都係揀送貨上門好啲。
打開個箱之後就見到個 mon，仲有個 mon 嘅支架同埋火牛。
配件
隨盒附送 1 條 HDMI 條，1 條 DisplayPort 線，仲有 1 條 USB 2.0 Type-B 線。
如果你想用 mon 後面個兩個 USB 2.0 Type-A 插頭嘅話，咁你就要將盒入面嘅 USB 2.0 Type-B 線由個 mon 駁落去你部電腦度。
之後仲有安裝時用嚟鎖實隻 mon 同支架嘅螺絲，仲有畀你用嚟掛牆同埋 VESA 支架 (100 x 100 mm) 專用嘅螺絲。
外觀
MAG274QRF-QD 嘅超薄邊框設計，一望落去就已經覺得好型，而同時又慳位。
有時有 D mon 尺寸一大起上嚟個邊框都會闊到阻住哂，呢隻 MAG274QRF-QD 正正就冇咗呢方面嘅麻煩。
話說背面仲有一條打斜嘅 Mystic Light RGB 燈條，夜晚熄燈見到個 mon 後面有燈著住真係夠哂氣勢！
輸入介面
輸入介面方面，MAG274QRF-QD 就非常齊全嘅。
常見嘅 HDMI 插口足足有成兩個，打算將呢個 mon 同時畀電腦同 PS5 用都冇問題！ (話說小編都好想有部 PS5 呀~)
唔好忘記佢仲有一個電競螢幕必備嘅 DisplayPort 插口，因為 HDMI 2.0b 極限只係輸出到 144Hz 嘅 2560 x 1440，要上 165Hz 就一定要用 DisplayPort 駁電腦。
最後唔可以唔讚嘅就係 MAG274QRF-QD 有 USB Type-C 插口。佢呢個 USB Type-C 係一個 DisplayPort 輸入插口嚟，可以方便一啲成部機只有 USB Type-C 同時又支援輸出 DisplayPort 嘅 laptop (例如 MacBook 及各款 ultrabook ) 或者部份手機使用，夠哂方便，啱哂同時畀多款裝置用呢隻 mon。
之後都有常見嘅 3.5 mm 耳機插口。
而尾二到尾四個三個插口就係 USB 2.0 Type-B 同兩個 USB 2.0 Type-A。頭先講線材個時都提過，用 USB 2.0 Type-B 線由個 mon 駁落去你部電腦度，然後就可以用到個兩個 USB 2.0 Type-A 插頭。
角度/升降調節
角度調節同高低升降對於呢啲尺寸較大嘅 mon 當然係必備架啦，但係小編就發現 MAG274QRF-QD 嘅可調節度係非常之高。簡直可以話任你點擺隻 mon 都冇問題！
傾斜 高度
旋轉
小弟估唔到嘅係呢隻 mon 甚至打直/打橫旋轉都得，以電競 mon 黎講算少有。可以將個 mon 打直咁擺，亦即係話都可以當佢係工作螢幕咁用。
OSD (On Screen Display)
咁小編我就比較懶，唔想特登裝個軟件，呢個時候都可以用個 mon 本身右下方背脊嘅紅色 joy stick 去控制隻 mon 嘅各種設定。
直接用 joy stick 去控制嘅 OSD 可以設定唔同模式，亮度、對比度、銳利度、色溫等等
同時另一頁仲有 Gaming 相關嘅設定，例如反應時間、夜視模式、Adaptive-Sync 等等。就算唔裝其他軟件嘅話都可以用盡呢隻 mon 嘅各種功能。
當然，你想直接用 keyboard 同 mouse 就控制哂個 mon 嘅話，MSI 嘅 Gaming OSD App 2.0 都幫到你！
試色彩
今次 MSI 呢隻 MAG274QRF-QD 最與別不同嘅地方就係用咗量子點技術。呢個技術可以令到螢幕所產生出嚟嘅紅、綠、藍，以上嘅三原色更加純。令到 MAG274QRF-QD 嘅色域比以往嘅電競螢幕更加廣，望落去嘅整體色彩更豐富同鮮艷。
再加上呢隻 mon 係寫明 HDR Ready，講到呢度就知呢隻 MAG274QRF-QD 嘅色水一定唔會令人失望。
唔單止色彩靚，WQHD 解析度之下呢隻 mon 連畫面都好細緻。
(用呢隻 mon 去睇風景片，又令小編諗起有得去旅行嘅日子T_T)
試執相
頭先都有提過呢隻 MAG274QRF-QD 係一隻量子點 IPS 螢幕，佢嘅色域大到可以覆蓋 97% DCI-P3 / 147% sRGB, 再加上 2560 x 1440 (WQHD) 嘅解析度，小編覺得用佢嚟執下相應該都唔會有太大問題，顏色唔會偏得太嚴重。
咁試完之後小編我就覺得呢隻 MAG274QRF-QD 確實係足夠應付基本執相剪片嘅工作。佢嘅色域夠廣闊，能夠顯示到唔同層次嘅顏色，用家唔使擔心話因為見到嘅顏色會太淡而執到張相啲色錯哂。
試打機
MAG274QRF-QD 係一隻有 165Hz 嘅 mon，同時又支援 NVIDIA G-Sync 同步技術，完全唔使怕會有畫面撕裂嘅問題，唔用嚟打機就真係浪費哂啦。
小編就拎左隻 Watch Dogs: Legion 出嚟試下呢隻 mon 打機效果如何。
量子點 mon 嘅高亮度令到畫面表現提升咗好多，動態範圍非常之足夠，光暗層次出哂嚟，可以留意到啲陰影位唔會黑哂，而陽光猛烈嘅地方都保留到細節，唔會爆光白哂。打機都最怕就係睇嘢睇唔清楚，用呢隻 mon 打機就唔使驚呢個問題啦！
雖然 MAG274QRF-QD 用嘅係 IPS 面板，但佢係一個少數 IPS 得嚟又擁有 165Hz 1ms 刷新率嘅 panel，咁高刷新率同咁反應快嘅 Rapid IPS 市面上實在少見。
咁 IPS 螢幕色彩表現有幾好大家都知，呢隻 mon 同時色彩同刷新率兩者兼得，用嚟打 FPS 嘅話，畫面唔撕裂，又可以睇到色彩豐富嘅畫面，正呀！
總結：一隻超越咗電競螢幕嘅螢幕
MSI 呢隻 Optix MAG274QRF-QD 啱哂會用嚟打機同時又對睇戲好有要求，又或者有時候需要進行創作嘅用家。
一般嚟講，電競 mon 都則重於刷新率同反應時間。刷新率可以上到 240Hz 甚到 300Hz，但多數都唔係用 IPS panel，同時色彩方面就點都差少少。
如果你想要超廣色域，用嚟睇戲、執相、剪片等等嘅話，咁一係你就買 D 專設計畀創作用嘅 mon，佢地多數都用 IPS panel，又有 4K 解析度同埋 99% Adobe RGB，但刷新率多數都只係 60Hz。
而 Optix MAG274QRF-QD 就集合哂兩邊嘅優勢，將以往技術好難做到嘅嘢變成做到，令佢變成打機又得，創作睇戲都得嘅 mon。
佢嘅量子點 IPS panel 加上 WQHD 解析度令到出到嚟嘅畫面非常震撼，再加埋 165Hz 1ms 嘅刷新率同反應時間，用嚟打機，不論係節奏快嘅 FPS 又好，重視畫面細節嘅 RPG 又好，MAG274QRF-QD 都可以畀到你最靚嘅畫面，簡直係頂級嘅享受。
佢擁有嘅 97% DCI-P3 / 147% sRGB 超廣色域，再加埋咁高嘅解析度，亦都可以畀你拎去用嚟執相同剪片等等創作用途，可以話係一個多才多藝嘅螢幕。
最後仲有佢嘅高調節度，同埋好易用嘅 On Screen Display，你亦都可以好舒適咁調較同用呢個咁頂級嘅 mon。
如果你係對屋企個電競 mon 好有要求，要色水靚、高刷新率、反應快、又要隻 mon 好型仔嘅話，呢隻 MSI Optix MAG274QRF-QD 絕對可以成為值得上依賴嘅一隻電競 mon。
MSI Optix MAG274QRF-QD
保養: 3 年保養
型號: MO-MA274QD
建議零售價: HKD $4,499
購買連結: https://shop.hornington.com/products/msi-gaming-monitor-optix-mag274qrf-qd-mo-ma274qdce-acpclb-mon
MSI 官方網站 : https://tw.msi.com/Monitor/Optix-MAG274QRF-QD